تياجو ألكانتارا إنضم لطاقم هانز فليك في برشلونة

تياجو ألكانتارا إنضم لطاقم هانز فليك في برشلونة، هيكون مساعد فليك لأنه بيعرف يتكلم أسباني وألماني ومن نفس سن اللاعيبة وبالتالي هيوصّل تعليمات فليك ليهم بشكل أسهل وفيه صداقة أكتر.
حاجة كمان بالنسبة لي بنفس درجة الأهمية وأكتر، تياجو هيكون عنصر مفيد لخط وسط برشلونة الشباب في أفكار إستلام الكورة وتسليمها والتحرك بين الخطوط امتى وازاي وليه.

ازاي تتحكم في مراحل لعب كاملة وأنت واقف مكانك لكن بتعمل scan طول الوقت علشان قرارك قبل ما تستلم يخلّيك تسرّع الرتم، التسديدات ودقة تحريك القدم بشكل عكسي مع الجسم.

حاجات بسيطة مش هي دوره أصلًا في الفريق لكنه هيتكلم فيها معاهم بما إنه هيكون متواجد، دي حاجة بالنسبة لي كنت منتظرها من وقت أخبار إنضمامه لطاقم فليك، دي أكتر حاجة محتاجها لاعبين زي جافي وفيرمين لوبيز مثلًا، اللي أدوارهم الشاملة ينقصها النقطة دي بسلاسة وعبقرية وبساطة تياجو علشان يكونوا في level تاني خالص.

تياجو ألكانتارا لم يكن له نصيب في برشلونة كلاعب، لكن وقتك ونصيبك دلوقتي كمساعد، والأهم، إنها رحلة مش هتأثّر فيها الإصابات!