تحليل شخصي لحيثيات بيئة نادي برشلونة حاليًا

منذ قرابة شهر، عندما كان الفارق بين ريال مدريد وبرشلونة أكثر من 10 نقاط، قولت إني الا ان الكرة في ملعب برشلونة، ليس فقط إنه ينافس لآخر نفس، بل إنه يستطيع الفوز بالدوري ايضا رغم كل شيء سلبي يخص النادي وبيئته، بشرط واحد فقط إن تشافي واللاعبين ينجحوا في إنهم يرجّعوا الثقة في نفسهم واللي هي كانت من 6 شهور بس قدر برشلونة ياخد الدوري والسوبر، برشلونة فعلًا بيعيش موسم سيء خصوصًا في مع الاداء الاخير اللي يقدمه.

يعني برشلونة كتير في الموسم الحالي وخصوصًا في بدايته، قدموا مستويات ممتازة حتى في النقط اللي ضاعت بسبب التحكيم، ورغم كده هو نفس الفريق اللي فقد نقاط بعد كده، ده مش فقر فني أو هيكلي قد ما هو فقر في الثقة،

ليه هذا حدث؟ لماذا فريق يبدأ الموسم بشكل جيد وفجأة يفقد الثقة؟ علشان هي دي آخر حاجة يقدر الأفراد الموجودين على تقديمها لو جمّعناهم كلهم في puzzle وحطّيناهم كلهم في الحِسبة مع بعض.

تعالى أوضحلك، بعد 10 ماتشات برشلونة بيكسب فيهم أداء ونتيجة، برشلونة إتعادل، كسب ماتشين بعدهم وبعدها إتعادل وخسر، شيء مرّ بيه ريال مدريد مثلًا في الموسم الحالي لكنه قدر يخرج من الدائرة دي زي ما هيخرج من دائرة ماتش فالنسيا،ليه؟ لأن لاعيبة ريال مدريد مش عيال صغيرة وأنا هنا مش قصدي السن، لاعيبة عارفين كويس هم قادرين يعملوا ايه، وعلى إِثره مش هيأثر عليهم نتيجة ماتش بسبب ضغط نموذجي لفالنسيا عليهم، لأنهم بالفعل يمتلكوا نفس اللاعبين اللي قدروا يكسروا ضغط أفضل فرق العالم مش فالنسيا بقى، ده شيء لا يملكه برشلونة، مفيش مخزون قوي يتسند عليه اللاعبين دي نفسيًا ويكون صعب تعرضهم لهزّة نفسية، في زاوية تانية لكن في نفس السياق، برشلونة قدر يكسب أتليتك بلباو اللي لسه كسبان

أتليتكو مدريد اللي بيعيش موسم ممتاز بمارك جويو، وهيكتور فورت الظهير اللي عنده 16 سنة قدر يوقف الأخوين ويليامز، وكان مع فونت فيه قلب دفاع عنده 16 سنة برده إسمه كوبرسي، وهم نفس الفريق اللي خسروا من نفس النادي في الكأس برباعية، that’s it، هي دي بيئة برشلونة، بيئة قادرة تقدم مستوى كويس لأن بالفعل فيه أرضية كويسة، لكن بدون ثقة مطلقة.

الناس هنا أول شيء هييجي في بالهم هو إنتقاد تشافي بحجة إنه لا يضيف الكثير في الزاوية النفسية دي، أوكيه، أنا شايف العكس أصلًا وشايف إن تشافي عمل فوق المتوقع والمنطقي كمان هنا لكن ده مش موضوعنا، تعالوا نعزل تشافي تمامًا من السياق سواء بالسلب أو الإيجاب بما إن الراجل ماشي بعد شهور خلاص، لكن خلّونا نقول إن تشافي إستلم برشلونة وهو مبيلعبش في أوروبا، برشلونة قبل تشافي بأسبوع واحد كان مش الفريق اللي خسر من ليفربول وباريس وبايرن بنتائج تاريخية، لا ده أصبح النادي اللي مش بيلعب في أوروبا وأسهل شيء إنه يخرج من المجموعات.

هذا موضوع تاني خالص أخطر بكتير، لك أن تتخيل يعني إن هدف ليفاندوفسكي في ماتش نابولي الماضي كان شيء مَنسي تمامًا إنه يحصل، إن برشلونة يتواجد في دور الـ16 ويسجل كمان،
ورغم كده برشلونة عمل ماتش ممتاز ضد نابولي ولولا غلطة واحدة كان زمانه راجع أسبانيا بفوز من إيطاليا، وقبلها بفترة برشلونة بيقدم فترة كويسة، علشان كده لما الثقة رجعت شوية وقبل ما يتم ترسيخها كمان حاليًا هنقدر نرجع لنقطة البداية تاني في بداية لما قولت إن برشلونة يقدر ينافس لآخر وقت وهم قادرين تمامًا يروحوا أبعد منطقة بكل سلبيات البيئة دي.

السؤال اللي بتسأله عشرات المرات يوميًا.. برشلونة يعمل ايه علشان يرجع ينافس على كل شيء من جديد؟

بعد إنتهاء الموسم ده، لو برشلونة عايز يرجع نادي “حقيقي” فالمفروض يسأل نفسه سؤال مهم.. الأهم هو المدرب القادم؟ أم الأهم هو الحديث عن الإدارة الرياضية في برشلونة؟ وجماهير برشلونة وإعلام كتالونيا والفولت العالي في إنتقادهم بلا سياق منطقي نظرًا للمعطيات الحالية؟

لأن صدق أو لا تصدق، برشلونة مش هيرجع نادي ممتاز في يوم وليلة حتى لو جوارديولا رجع وحتى لو أزمة النادي ده إتحلّت في الرواتب والفلوس، علشان كده، لازم مدير رياضي، ديكو شخص كويس في نقطة وحيدة وهي التعاقدات، يعرف يخلّصلك صفقة صعبة ومش لوحده يقدر يصيب في إختيار الإسم المناسب، لكن لازم شخص يلم كل ده، مدير رياضي يقدر يمنطق ويفلتر كل ما يدور في النادي ويضع كل شخص في مكانه بدون التدخل في زوايا لا تخصه مش هيقدم فيها بل هيأخّر.

مازلت شايف إن لابورتا عمل أشياء خيالية في فترة وجيزة وهو الأنسب بمكانه، ولكن بكل صراحه لازم يعين ناس تليق ببرشلونة في أماكن مش موجود فيها حد أصلًا.

خلصنا من الإدارة والمدرب الجديد؟ لازم ولازم ولازم زيادة التأكيد على إن برشلونة بيعيش أسوء فترات حياته، علشان يا جماعه ده مش إكليشيه بل واقع سواء قبلته أو لا، إنتقد براحتك لكن أنت لا تملك رفاهية الآخرين في تعديل أخطائك، بل على العكس أنت مازلت لم تتعافى من أخطاء شخص ترك النادي من 4 سنين وبعده أتى جيل تاني خالص، لازم الناس تفهم مثلًا إن سقف رواتب برشلونة قلّ من 270 مليون لـ 204 مليون يورو، يعني ايه الكلام ده؟ يعني برشلونة لازم يقلل 66 مليون يورو من الرواتب اللي بيدفعها للاعبيه، يعني ايه برده؟ يعني أقل شيء يحصل إن يتباع 3 نجوم منهم إسمين رنّانين ويشيلوا فريق كامل، اللي صدق أو لا تصدق، مش موجودين أصلًا، يعني مش برشلونة مش هيقدر يصرف، بل كمان لازم ينقّص أجوره، في حين إن ريال مدريد متخطي سقف أجوره 720 مليون يورو وفي حين كمان إن لابورتا نفسه قلل حجم الأجور من 700 مليون لـ400 مليون لـ270 مليون في شهور بسيطة.

كان زمان بيتقالّنا اللبيب بالإشارة يلقطها وهي طايرة، دلوقتي هي مش طايرة، بل هي جاهزة للفهم، علشان كده كان واجب لمّ الدنيا دي كلها في زوايا متعلقة ببعض علشان الناس تفهم حيثيات بيئة نادي برشلونة حاليًا.