اصابات بالجملة في صفوف نادي برشلونة

مشجعو نادي برشلونة ينتقدون بشدة الطاقم الطبي والرياضي ويتهموهم انهم سبب في عدم إعداد اللاعبين بالشكل المناسب وبالتالي بيتصابوا، لكن فيه أندية أسوء من كده بكتير مش بيحصل معاهم 1% من اللي بيحصل في برشلونة ده، نادي في كل موسم بيتصابله أهم لاعبيه في أهم مراحل الموسم حتى لو كل حاجة أصبحت مميزة، في الموسمين اللي فاتوا في دور المجموعات لما النادي بيبدأ بشكل ممتاز كل النجوم بيتصابوا وكل حاجة بتتفكك، وقبل الحكاية دي بيتصاب نجمه الصاعد آنسو فاتي بإتنين صليبي وتمزق داخلي وخارجي في غضاريف الركبة، فيروح برايتون علشان يستعيد مستواه، فيتصاب تاني، حتى بالدي اللي مش بيتطور مؤخرًا برده بيتصاب.

النادي الخطوة الوحيدة للأمام هتفرق معاه بعد سنين من العبث والفساد، نادي بيدخل أزمة مالية طاحنة وبيكون عنده كنز إسمه لامسيا يعتمد عليه لكنهم بالكامل إتصابوا، ومش بس كده، بل بيتم إتهامه بإنه متورط في قضايا تحكيمية وبيتبرّأ منها، تيباس رئيس رابطة الليجا يسكت؟ لا، يطلب من برشلونة يقلل رواتبه بعد ما تم تقليلها 4 مرات من 700 مليون لـ200 مليون، يعني كمان لازم برشلونة يبيع لاعبين نجوم علشان سلم الرواتب ميحصلش فيه خلل.

في الموسم الراهن الفريق بيصعد دور الـ16 في أوروبا أخيرًا وبيتصاب 14 لاعب منهم نجوم الفريق أكتر من إصابة، بنقول ماشي وهتعدّي، يقوم دي يونج وبيدري يتصابوا وقبلهم جافي قبل ماتش العودة والمرحلة الحساسة الجاية بـ10 أيام.

النادي ده حتى مع جوارديولا في أبهى وأقوى فتراته كان لازم يقدم 100% من قوته مش 99% بس مثلًا علشان يكسب، في 2012 النادي ده إتحرم من سداسية تانية لتفاصيل أتفه مما تكون وعلى إثرها النادي كله إتفكك وحقبة جوارديولا إنتهت بعد رابع موسم لها بس، النادي الوحيد اللي مطلوب منه إن كل شيء يكون مثالي مش بس متميز علشان يقدر ينافس ويكسب بطولات.

برشلونة هو أغرب أندية العالم وأكثرهم نحسًا في تاريخ الكوكب كله.